كيف تقتل المثالية ؟
يمكن اكثر حجة أسمعها من أغلب المبدعين هي : أنا فنان مثالي ومايعجبني أي شيء ، ولا أرضى بأي نتيجة. وهذا السبب جعل كثير من المبدعين يحرموا العالم من فنهم ، فيلا نشوف مع بعض كيف نقتل المثالية .
أول شيء خلونا نعرف الفنان المثالي:
هو الشخص الذي يرفض أن يقبل أي عمل لا يحقق المعايير الكاملة . ( أحسن فكرة ، استخدام ألوان غالية ، نتيجة خالية من الأخطاء ، دائما لازم فيه شيء يتغير )ودائما يرغب بالمزيد من الوقت ، أدوات أكثر احترافيه ، حالة مزاجية أفضل ، مساحة أكبر ، أفكار خرافية أكثر … الخ. فبالتالي تكون حالتك الذهنية دائما في حالة انتظار، وما تبدأ أي شي.
ممكن قرائتك لهذا النص تعطيك ” كف ” فجائي لكن : تستوعب إنه كل هذه الأفكار ماهي إلا مجرد أعذار.
وترجع جذور المثالية إلى الخوف ( دائرة جواتها كلمه خوف وفوقها تاج ) : الخوف من الفشل ، الخوف من الرفض ، الخوف من ردة فعل الآخرين…الخ .
وبصراحة أغلب الشخصيات المثالية ترفض الاعتراف بها وتتحجج بأعذار أكثر ، فخليك لطيف مع نفسك ومو عيب إنك تكون مثالي بالعكس الصح إنك تعرف طبيعة شخصيتك وكيف تتعامل معاها بدل ماتهرب طول الوقت.
والواقع يقول : إنه عمرك ما توصل للحظة المثالية ، فلا تضيع وقتك في الانتظار.
طيب عطينا الحل !؟
١- خفض توقعاتك عن نفسك وعن العمل الذي تنجزه : خليك فاكر بإنه مو مطلوب منك تنجز عمل أسطوري أو ( يكسر الدنيا ) في كل مرة.
٢-ارمي نفسك : في كل مره تشعر بإنك متردد أو خائف من البدء خذ بيدك وأبدآ على صفحة فاضية ، حرك جسمك ، يدك أول وأبدآ بالتنفيذ والحركة تعطي إشارة لعقلك وإذا بدأت الشغل بيدك ، سيتبعه عقلك.
٣- اشتغل بعشوائية : وحدة من الأساليب اللي ساعدتني اتغلب على المثالية اني اكتب قائمة مهام وبعدها ابدأ اشتغل بعشوائية ومع الوقت أرتب الشغل. ( مو لازم تبدأ بالترتيب ) .
مثال : عندك منتج معين تخطط لتصنيعه
المهام بالترتيب : ١- الفكرة ، ٢- التصميم . ٣- التواصل مع المصنع . ٤- تعديل التصميم . ٥- صناعة العينة . ٦- التفاوض.
فممكن تبدأ على طول تكلم المصانع وتأخذ منهم أفكار وبعدها ترتبها في صورة فكرة رئيسية وبعدين تعمل التصميم، خليك مرن في إنجازك .
٤- اتقبل العمل : حاول تعود عقلك تتقبل العمل بنسبة ٧٠٪ وانسى ١٠٠٪. ممكن يكون صعب عليك في البداية لأنك متعود بس معليش اضغط على نفسك شوية . وخلينا صريحين مع بعض : هل جربت مره تعدل على اللوحة حتى توصل لنتيجة أفضل بس صار العكس ؟ وخربت عليك ؟ ركز إنك تنجز أعمال أكثر ، نماذج ، كتابات ، وتصنع الكثير من المسودات.
٥- ابدأ بفكرة وحدة : أكثر شيء يعاني منه المبدعين في البدء هو اختيار الفكرة الأفضل من بين مليون خيار. لا تشتت نفسك وعشان تقدر تركز دائما حدد فكرة رئيسية وأبدأ فيها وأترك الأفكار الثانية كخطة بديلة ، أو ممكن تبدأ تضيفها بالتدريج لفكرتك الرئيسية .
مثال : عند كتابتي للمقال كانت الخطة إني اكتب عن المزاجية في الإبداع ومع البحث شفت إنه المثالية موضوع أفضل ، فقررت أخليها الفكرة الرئيسية وأضم محتوى المزاجية داخل المحتوى وبعدين حاكتب مقال منفصل. شايف كيف ؟ بسيطة ؟
واتذكر :
الإنجاز أهم من المثالية
لأنه دائما حيكون في فرصة لتعديل الأخطاء بس عمرك مح تتطور وتنجر إذا مازلت تنتظر وتعدل مليون مرة.